老早看演唱會，票價嘸沒現在貴，也嘸沒現在搶手。當年看演出儕是憑紙質票進場個，每趟演唱會散場之後，我儕會拿演出票收好，留作紀念。哪能像現在，基本浪向儕是電子票，進場辰光扯票根個儀式感，儕變成掃碼了。電子票截屏雖然也能保存，不過只好存辣雲空間里向，總歸有種空落落個感覺。
演唱會開演前頭，「黃牛」老早就開始做生活了，大概離體育場一兩站路個地方，伊拉就開始兜售演出票了。一樁神奇個事體是，「黃牛」手裡永遠有儂要個演出票，去得早點，還能跟伊拉討價還價。當然嘞，迭個也是場心理博弈，越臨近演出開始，黃牛越急著出票；但真正熱門個演出，臨到開演辰光可能就嘸沒票了，所以誠心等退票個觀眾要掌握分寸，錯過就真箇嘸沒了。
老早看演唱會，場館前頭一排賣熒光棒個攤頭。演出快開始辰光，拿熒光棒從當中一拗，熒光就亮起來了；就是散場辰光，迭種一次性熒光棒儕被厾辣場館裡，蠻浪費個。現在看演唱會，開演前場館沿路也有賣小物事個攤頭，勿過賣個物事變了。儂還會聽到「五元老公帶回家」迭種老噱個宣傳語，抬頭一看，原來是印著明星照片個手幅。粉絲們還會穿上統一顏色個衣裳，走出地鐵站個辰光，老有儀式感個。
演唱會是粉絲個狂歡，現在大家熟悉個熒光棒，常常是主辦方統一準備個。迭種熒光棒勿像老早個塑料棒，是可以循環用個，而且儕聯通到數控台，導演能按照歌曲節奏控制燈光節奏。從高機位拍下來，就能看到燈光海洋分區聯動：節奏舒緩個歌曲，燈光就營造出暖暖個感覺；節奏快個歌曲，燈光就跟仔節奏切換，老扎勁個！對整場演唱會來講，觀眾勿再像老早只是看客，每個觀眾其實也成了演唱會個一部分。哪怕伊嘸沒揮舞熒光棒，手裡捏個熒光棒，也算是演出個一部分。我第一趟看到迭種效果，是辣紀錄電影《泰勒·斯威夫特：時代巡迴演唱會》里，對我搿種多年嘸沒看演唱會個人來講，視覺衝擊老強烈個。
前一陣去看《最愛金曲榜》演唱會，斜氣驚喜，現場熒光棒也有迭個作用，就是顏色還比較單一。後來我辣電視浪看重播，發覺現場燈光海洋個變化勿大，但單講烘托氣氛，也算是有進步了。看演唱會就像看電影一樣，是沉浸式造夢個過程，不過現場參與感比看電影強多了，跟成萬上萬個同好一道狂歡，身體分泌個多巴胺能持續好幾天。
搿天全場亮起個手機燈光就像滿天星辰閃爍，觀眾揮舞個熒光棒充滿節奏感。辛曉琪唱《味道》個辰光，間奏里講伊老感動個。迭種現場個氛圍感，聽唱片是絕對嘸沒個，大概正因為迭種感覺，演唱會經濟才介火爆。ai本事再大，也永遠替代勿了人與人之間有溫度個互動呀。
