老早看演唱会，票价呒没现在贵，也呒没现在抢手。当年看演出侪是凭纸质票进场个，每趟演唱会散场之后，我侪会拿演出票收好，留作纪念。哪能像现在，基本浪向侪是电子票，进场辰光扯票根个仪式感，侪变成扫码了。电子票截屏虽然也能保存，不过只好存辣云空间里向，总归有种空落落个感觉。
演唱会开演前头，“黄牛”老早就开始做生活了，大概离体育场一两站路个地方，伊拉就开始兜售演出票了。一桩神奇个事体是，“黄牛”手里永远有侬要个演出票，去得早点，还能跟伊拉讨价还价。当然嘞，迭个也是场心理博弈，越临近演出开始，黄牛越急着出票；但真正热门个演出，临到开演辰光可能就呒没票了，所以诚心等退票个观众要掌握分寸，错过就真个呒没了。
老早看演唱会，场馆前头一排卖荧光棒个摊头。演出快开始辰光，拿荧光棒从当中一拗，荧光就亮起来了；就是散场辰光，迭种一次性荧光棒侪被厾辣场馆里，蛮浪费个。现在看演唱会，开演前场馆沿路也有卖小物事个摊头，勿过卖个物事变了。侬还会听到“五元老公带回家”迭种老噱个宣传语，抬头一看，原来是印着明星照片个手幅。粉丝们还会穿上统一颜色个衣裳，走出地铁站个辰光，老有仪式感个。
演唱会是粉丝个狂欢，现在大家熟悉个荧光棒，常常是主办方统一准备个。迭种荧光棒勿像老早个塑料棒，是可以循环用个，而且侪联通到数控台，导演能按照歌曲节奏控制灯光节奏。从高机位拍下来，就能看到灯光海洋分区联动：节奏舒缓个歌曲，灯光就营造出暖暖个感觉；节奏快个歌曲，灯光就跟仔节奏切换，老扎劲个！对整场演唱会来讲，观众勿再像老早只是看客，每个观众其实也成了演唱会个一部分。哪怕伊呒没挥舞荧光棒，手里捏个荧光棒，也算是演出个一部分。我第一趟看到迭种效果，是辣纪录电影《泰勒·斯威夫特：时代巡回演唱会》里，对我搿种多年呒没看演唱会个人来讲，视觉冲击老强烈个。
前一阵去看《最爱金曲榜》演唱会，斜气惊喜，现场荧光棒也有迭个作用，就是颜色还比较单一。后来我辣电视浪看重播，发觉现场灯光海洋个变化勿大，但单讲烘托气氛，也算是有进步了。看演唱会就像看电影一样，是沉浸式造梦个过程，不过现场参与感比看电影强多了，跟成万上万个同好一道狂欢，身体分泌个多巴胺能持续好几天。
搿天全场亮起个手机灯光就像满天星辰闪烁，观众挥舞个荧光棒充满节奏感。辛晓琪唱《味道》个辰光，间奏里讲伊老感动个。迭种现场个氛围感，听唱片是绝对呒没个，大概正因为迭种感觉，演唱会经济才介火爆。ai本事再大，也永远替代勿了人与人之间有温度个互动呀。
